12日買到破產摩洛哥@Day9 Chefchaouen

日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou‌> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah

網上評價好嘅早餐，但係我地食到個口同胃都無福消受，實在太乾太硬嘅餅。

 

路過家樂福，我地又要求停車入去買買買，司機好疑惑我地去超市有咩買。

 

唔好食咁飽，再次上路唔會頂住頂住想嘔。我地坐大約4-5小時車就到藍色山城Chefchaouen。沿途我地經過一d唔出名嘅景點，司機都會停低比我地影相、休息、(又)買野。如果唔係入到鄉鎮，摩洛哥好多地都係荒莫，草樹都唔多，所以呢個湖都可以算係景點之一吧！？

 

因為路上講開邊度買靚橄欖油，司機再次好奇我地呢班友仔，佢話橄欖油成個摩洛哥都係嫁啦~行開行埋都搵到靚。就係咁經過一條村，司機就帶我地睇百年橄欖老樹和搾油機。

10月份唔係收成季節，只能睇下未熟橄欖。無得買新鮮搾嘅油。

經過無名小村有是日market，聽日就去第二條村嫁啦！司機搵位泊車都有困難，行咗個圈market都幾大，有好多二手衫褲鞋貨品、薄荷葉、大粒棗子、乾無花果、糧油雜貨等。

 

為咗想睇住呢個藍色山城食早餐而訂呢間Hostel，點知天台裝修緊。

 

 

話咁快時間又過去咗，我地把握最後時間向山上清真寺衝，睇埋日落！事後發現藍色山城嘅霧海日出係好靚，只可惜我地無時間再留......

少咗阿菜隻腳👀👀

黎到呢度，我覺得開始疲倦，無心機影相寫postcard，藍色山城對我嘅震撼度都唔夠大，可能已經睇慣咗。

話說晚餐我地諗住食trip advisor高評分嘅意大利pizza餐廳，點知我地又明顯被歧視。餐廳好多人等位，朋友入去問係咪要預訂，要等幾位等，都得唔到待應任何回應。旁邊等緊位嘅外國人話比我地知，佢地等緊餐廳入面嘅位，我地唔介意坐外邊張炲，而家都可以入座。我地再入餐廳查詢，待應做出一個笑而不言請我出門口手勢。

 

無心插柳食咗間中國菜，真係久違咗嘅麻辣味，仲有酸辣土豆絲。味道好正宗！