大牧羊仔仔出走日記: 12日買到破產摩洛哥@Day3 Marrakesh

日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou‌> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah

咪話每個城市都有一個導遊帶我地行嘅，我地係Riad等左陣都未見有人黎接我地，之後見到個大叔坐咗係度，咪問下佢係咪我地個guide。佢就話係度等"嫁絲"，我地咪問，係咪等"翠絲"先岩啊？佢死都話唔係，翠絲唯有搵返個司機幫手。溝通咗一輪，原來"翠絲"嘅阿拉伯文係"嫁絲"😕

庫圖比亞清真寺(Koutoubia Mosque)

開咗個頭唔顺利，為個名執著咗我地好一陣子，我地除咗哈哈哈SO FUNNY都無咩好講。之後我地每問一句野都好似唔L岩咁，問下行咩景點都要掛？唔係只係跟住佢行，又唔出聲講去邊囉！唔問由自何，一問把幾火，佢話你想去邊係你話，唔係按我個行程，真係噢撚囇個咀仔😮😮😮係咪我d poor broken english得罪咗佢 😮😮😮我地比你更知要行乜，咁退返錢比我地自己行囉，唔該！

庫圖比亞清真寺(Koutoubia Mosque)

之後烈日當空下+無野睇嘅空地講庫圖比亞清真寺(Koutoubia Mosque)、皇朝歷史，仲要係咁DO YOU HEAR ME?強烈嘅上歷史堂感覺返咗黎，可以走得未呢？歷史我睇咗Lonely planet介紹嫁啦😪

Bahia Palace(巴西亞皇宮)

我地一開始就講唔睇Saadiens Tombs，想去巴西亞皇宮(Bahia Palace)，佢又好似好唔信咁，問咗我地幾次係咪唔去Saadiens Tombs。係啊，真嫁，你自己都話比70 durham只係行10-20分鐘，仲睇咩啫😀

Bahia Palace(巴西亞皇宮)

跟住我地話想去The son of Joseph School，佢又同我地爭論點解叫呢個名，你地叫錯名，要叫Ali Ben Youssef Madrasa先岩.....Balbalaba.....咁google map叫呢個名，我地控制唔到，真係成件事so funny！最後9 up完一輪，佢先講間野close咗修繕2-3年，你地唔知嫁咩？唔知係正常吧，你地D野會出告示嫁咩😀

搞搞下，中午先去到Bahia Palace。早上係影相黃金時間，人少太陽溫和。中午影出黎陰影太暗，光又太爆。因為好曬，我地自己影相都要迷起眼。

左邊話係皇帝坐嘅窿; 右邊係妃子住嘅房，有10幾間左右。

摩洛哥好多塘鹅係屋頂起巢，城牆都唔例外，黎到呢個Bab Agnaou，係馬拉喀什19個城門之一，建於12世紀。

進入Bab Agnaou後，local guide話紅色牆係以前猶太人住所，而家都仲有人住緊。

有bloger話呢邊D甜點多蜜蜂即代表用真正蜜糖，越多BEE D人越鐘意。咁多我見到都驚驚，我唔信多BEE BEE多人買，最多人買果間甜品店都無蜜蜂嘅！

每次旅行必買手信 - 烏龜！！梗係唔係買生嫁啦！每去一個國家旅行，我都會搵下有無烏龜嘅擺設送比細佬，今次買咗隻用灰色石頭鑿出黎嘅龜仔。估唔到係北非都幾多烏龜精品，連鍍金鑲嵌水晶嘅擺設都有。

跟住個guide係咁行啊行啊~~途經見到好多賣粉，乜野粉呢?唔知，因為問唔切，佢已經行遠咗。

好多棗WOR！想睇下，點揀先靚？佢又行遠咗。

D杯又幾靚WOR，睇下得唔得啊？阿guide又消失係人群中......

排曬隊買嘅小食店，個guide話呢盤係醃嘢，黃色醬下面可以係魚或肉類。

最後頂唔順，唔知佢會帶我地兜去邊，我地好多野都未睇，已經行咗去第二度。翠絲就同佢講，我地自己行得啦，但係佢話司機要會合返我地先，就咁佢帶返我地出Jemaa el-Fna。

會合嘅原因係我地未比訂金司機，比完錢後正式同個guide分別，萬幸！一個唔好嘅guide係好影響我地心情及安排。

下午茶時份，我地先去尋找隱世餐廳，希望仲有飯食。Marrakesh嘅路雖然小巷多，睇住google map總算唔難搵，比起Fes嘅縱橫交錯，又有死胡同嘅路顯得簡單。

原本翠絲搵咗間好高評分嘅餐廳做今日午餐之選，可惜星期二休息。無乜頭水之際，係Trip Advisor搵咗間多好評嘅餐廳Riad Bazaar Café試一試。

摩洛哥永恆不變的前菜😂

摩洛哥做事風格比較隨性，我地只係叫咗一份雜錦拼盤，變咗1份價錢比3盤。之後都間鐘遇到呢D送大禮，當下都有D驚驚埋單要收錢，但明明人地話FREE嫁，食咗先算XD

食完下午飯，距離訂咗位食晚餐時間仲有2個鐘，行返Riad又有少少遠。大家仲諗緊要唔要坐馬車時，又怕貴比人劏，求其問岩岩行過我地身邊嘅馬車，還價250 durham成交，而且馬夫好搞笑，又比我地控制D馬仔，令今日行程嘅開心指數提升返唔少。

嘻嘻哈哈坐咗個幾鐘馬車，行咗市區一圏，睇埋日落去食得晚飯啦！

晚餐預訂咗Dar Cherifa，同今朝間餐廳只差一個街角。當我地行咗入窄窄槪橫街，馬上彈咗個青年人出黎，好積極咁帶我地係小巷左穿右插行入Dar Cherifa。佢身邊仲有個青年人一直同佢傾計，初時我覺得係佢嘅朋友，之後諗深一層可能係隔離餐廳請返黎搶客嘅0靚仔。呢邊嘅競爭都幾西利，係香港都幾難見到做野咁積極嘅年青人，我地果時係咪要比貼士呢？