2015年8月29日星期六

Day5-6 四日三夜養生團-Amerzon Basin

日期:24/3/2015-24/4/2015
行程:Puerto Maldonado>Amerzon Basin (Tambopata National Reserve)
交通:Tarantula Expedition

亞馬遜好快到尾聲,但有時又覺得時間好慢長,特別係比蚊咬到又痕又痛又腫左成隻雞蛋嘅感覺好似揮之不去咁。最後一日景點去遊覽LAKE SANDOVAL,遇到回程嘅英語系遊客問"你遇到了惡劣情況沒有?" 當下我唔知要比咩反應,原來只係一句輕鬆嘅笑話,係我get 唔到@@"
原來所講嘅惡劣情況係要行一條約4小時嘅泥路入碼頭仔再坐船仔遊LAKE SANDOVAL。泥坑都幾深同埋好滑,唔小心都滑到一下搞到成褲泥。途中能見到物種唔多,都係常見嘅馬騮、切葉蟻、凱門鱷、話說湖中有食人魚,導遊叫我地唔好放隻手落水。 
最特別嘅,相信都係呢隻水雞,係湖邊經常見佢蹤影,飛嘅時候會見到條好長尾巴。
當地人每人拎一個好大條嘅香蕉種子入餐廳附近種
行咁耐終於到呢個碼頭坐船遊LAKE SANDOVAL,離開有食人魚嘅叢林區後,導遊話LAKE SANDOVAL呢度d水好乾淨,我地可以係度游水同埋飲下呢度d水。
黎亞馬遜除左上生物課,仲可以上埋地理課。呢個湖屬於牛軛湖(Ox-bow lakes),形成於河川中下游河道,當河水流到中、下游時,河道於轉彎位,外側流速比內側快,就會形成牛軛湖。是咪好深呢?睇下圖解就明啦!
午餐食亞馬遜傳統食物Juanes,一隻凍冰冰好似糉嘅野,有雞肉係入面。我望一望......點解隔離枱食得咁豪華嘅?我地得一隻糉咋.......導遊都無言以對......
回程時落好大雨,要靠岸避一陣,靚仔導遊係check point嘅迷你博物館講解左陣動物骨頭,就忙住去同check point嘅員工妹妹傾計,行程真係hea左少少.....
壓軸好戲night walk!終於睇到多d唔同嘅昆蟲啦!可惜相機無電,只好拎同團朋友嘅相,我嘅幫忙就係打燈,每張相都少不了我同導遊嘅努力,同埋3個人比蚊咬到痴線嘅一晚。









聽日一早要坐船返Tarantula Expedition公司拎返大背包等巴士去庫斯科,最後一晚嘅晚餐一枱人坐埋一齊食得好開心,雖然我d英文勁差又唔識西班牙文,都無阻雞同鴨講嘅溝通,靚仔導遊再一次同我重溫多日來所見所聽到嘅鳥類。最興奮係見到蜂鳥,對翼真係好似蜜蜂咁,而且飛得好快,同團嘅朋友只係轉身,已經舜間消失左。
返到市區,即刻沖返個熱水涼,為我生平第一個咁長途嘅夜巴作準備。未夠鐘上車,當然要行下Puerto Maldonado個main market順便病肚。食人魚就無得釣,睇下標本都好。仲買左個用椰子殼做嘅烏龜電話座,好鬼得意!
同行朋友件衫爛左,考慮補同唔補之間。唔好煩!我幫佢決定左啦!原來決定左先係最煩,朋友坐係阿姐面前又要咁又要咁,但係完全溝通唔到,阿姐好無奈咁笑一笑,即刻車車車車...好比我地,送客XD
7 sole嘅雞飯!20蚊港幣左右,好抵啊!
驚世大發現係.......made in japan嘅匙和叉!!!
以外表睇係蛇皮果,睇人地blog介紹過Aguaje棕梠樹嘅種子都有幾分似,當日未見到姐姐點做果汁,亦唔知呢個係乜,買包試下先.......嗯......都幾古怪,甜甜地,有少少粉粉地同發酵嘅味,飲完仲好似有d飲醉嘅暈暈地,究竟呢包係乜黎@@"
買d生果上車食先,今晚唔怕餓親!
街頭小食多數都好吸引,普通嘅串燒配個薯仔,買多枝啤酒坐係街邊,真係好地道!咁食2-3串都已經貴過食一份雞飯啦XD
由超期待,計劃旅程,到出發,再到玩完工6日阿馬遜,係此時此刻企係馬路中心望住個咁靚嘅天有d感慨時間過得咁快.......比我企多陣!人生無乜幾何再黎......
唔係唔想企多陣,而係班車唔等人。比完2.50 sole稅,原本係坐5:45pm果班車離開,搞完一輪雞同鴨講,仲搵埋鄉里帶我上車,已經係7:00pm........我仲等緊上巴士啊!係咪黃牛飛黎嫁?!遇到個香港女仔,馬上去打探人地坐幾點車交個朋友啦,佢開口以流利英語沒半句廣東話講完,心諗利害啊~我都想有咁勁嘅英文!原來係UK回流返香港工作,放假黎玩一星期。上車後,我係車頭,佢係車中間,我地無再交流,繼續各自享受12小時巴士之旅。每2-3小時巴士都會停站比人上車落車,比小販上車賣野,要訓得著真係要有好高修行!加上向高海拔進發,Tarantula嘅員工都講過隨時有人嘔嫁!咁好彩真係撞着坐隔離嘅肥阿姨嘔到七彩,仲要直接嘔落地!Ho my god!!即刻比個膠袋佢嘔,再比枝白花油佢搽兩下.......
天啊!我都想嘔X_X"

2015年8月28日星期五

Day4 四日三夜養生團-Amerzon Basin

日期:24/3/2015-24/4/2015
行程:Puerto Maldonado>Amerzon Basin (Tambopata National Reserve)
超級熱嘅一晚,但都訓得好好,直到零晨三點幾比好似老鼠嘅吱吱聲嘈醒。之後都無辦法訓返,唯有起身準備去睇Macaw clay lick啦!
四點幾出發坐一個鐘船到指定位置等待金剛鸚鵡。無錯!就係等佢地出黎食呢一片泥牆。可惜係天陰陰,鸚鵡們都唔黎食,話說要太陽大大個曬到爆個時先飛出黎食泥,話說食呢幅牆嘅泥可以解開佢地食堅果嘅毒素。
等左好一陣都無野睇,導遊帶左我地走入長草堆中,遠望另一個位置嘅泥牆,果然有幾十隻綠色鸚鵡。睇左無幾耐導遊示意離開,去返原來位置時見到空地上坐滿一班人黎睇金剛鸚鵡,呢刻我心諗......頭先個度應該係禁止進入區域,要睇Macaw clay lick只能坐係呢片空地上遠遠遠遠.......距離咁望
另外果(貴)團為團友準備嘅生果,因為有剩好多,佢地送左幾個比我地食,導遊話都係熱情果嘅一種,價格比較貴,係亞馬遜地區先搵到。雖然好香好甜,不過食下食下我覺得好似食蟲蛋XD
是日早餐......講真唔係好岩我口味,同行朋友一直講話好多蟻係麵包上面行過,咁上枱睇唔到屍骸咪算囉...好過係香港食碗牛腩河跟小強掛,不過點都好唔食無得食:P
遠道而來又壞車,又過水坑,又行,又坐船,為左睇Macaw clay lick。睇完要返出去第二個Hut時,路況比琴日更差,導遊叫當地住嘅人開台3輪電單車載我地離開水坑嚴重路段。坐左成粒鐘,都唔知行左一半未,"噔"到屎忽開花,仲要爆埋肽!!係呢個叫天不應叫地不聞嘅路上點算啊?等左陣,本身要黎載我地嘅4WD出現啦!原來係佢遲到T_T
呢個時候導遊問我地有無30sole比個當地人當係車馬費.......但我有少少不滿,點解仲要我比錢?我問導遊乜唔係個團包曬車資咩?同行朋友話,最後見到導遊只比左10sole人地......有無搞錯啊囧
回到Puerto Maldonado再要轉船約30-45分鐘,等船期間咁鬼熱梗係要飲返枝可樂,enjoy冰涼時間有對藍眼金髮情侶問......你地去邊探險?點解成身都係泥?好唔好玩啊?醒目嘅導遊即刻向佢地介紹balabala.....呢個monment我地已經上左船,準備向Madre de Dios river 出發........
"Arrive at our next lodge 'Amazon Tambopata Lodge' where we night in our confortablelodge..."
介紹得幾好咁WOR,真係咁舒服?!舒服定義真係因人而異,無蚊我會比90分......咬到我呢,係肥係腫有少少難分!又痕又痛~嗚嗚.......
八厭星~無時停!
雖然變態,但我都想講....每次見到佢自己摔"啫啫"我都覺得好神奇,好搞笑,好似見到一個迷你版人類,點解眼耳口鼻手腳連器官都同人一模一模......我真係好大鄉里,咁近距離觀察生物都係第一次。原本今晚有night walk,但見到行雷好似就落雨,加上同行朋友覺得超多蚊而且對昆蟲無興趣,所以無行lu!晚上8點Good night!