12日買到破產摩洛哥@Day7 Merzouga Desert, Azrou, Ifran, Fes

日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou‌> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah

晨早6點人地已經係沙丘頂ready，我地仲係個帳篷傻傻下等人黎。等咗都20分鐘，聽到有車聲，我地先識摸黑行上沙丘。

我開咗大約半個鐘左右，經常食咗落沙要教練幫拖。到差唔多時間，教練帶我地到比較高嘅沙丘睇日出，等待期間教練同佢個伙計凍到要生火取暖。

黎到行程中段，我地都無遇到驚險遭遇，平安地渡過每日排得緊密嘅節目。再加少少Luk睇埋金色撒哈拉沙漠日出。

開車返營地後，再次坐半個鐘駱駝返出小鎮。原來坐駱駝係可以坐到屁股痛，手又酸痛😓

望住前面嘅靚仔哦爸背影，全身嘅痛都無咗，遙咗半粒鐘.......返到小鎮。同靚仔分別，我地返去寄存行李嘅酒店刷牙、換咗我條坐駱駝坐到穿窿嘅褲。

酒店預備好嘅早餐都係同之前食過嘅一模一樣，又乾又硬嘅煎餅、橙汁、果醬。我知呢度係沙漠，唔容許揀飲擇食，我地再努力都梗唔落。第一次感受到自己對食咁有抗拒.......摩洛哥嘅食物係有好強魔力😑

翠絲同我都驚死沙漠入邊無啖好食，帶咗4個杯麵同零食入黎，估唔到老闆煮嘅塔吉窩係成個旅程入面嘅好食指甚高。搞到4個杯麵又出返沙漠......而家唔食分分鐘帶返香港。個個誓願咁款坐係度無曬胃口，估唔到杯麵嘅出現勾返起大家食慾。我呢世都記得有人話D杯麵好食到要講粗口😏

無沖涼+唔夠訓，再坐6個鐘車去Fes，咪話唔攰，鬼叫我無AL，要成班friedns陪我玩得咁趕。

我地已經唔追求食飯呢件事，個胃好頂住頂住，其實呢D係咪暈車浪😵😵

飛咗幾耐車，我地就訓咗咁耐，黎到Azrou國家公園睇北非野生獼猴，馬騮？香港大把啦！就咁睇無特別，除咗佢無咗條尾。睇資訊先知係非洲大陸撒哈拉沙漠以北地區除咗人類之外，北非獼猴係唯一的靈長類。分布係東亞至西北非嘅獼猴就只有佢地適應及生存落黎。

  

順路經過睇完馬騮，坐多陣車去Ifran，司機話呢度係摩洛哥最有錢嘅人住嘅地方，打做到瑞士咁款，天氣清涼得有D凍，似乎我地真係去咗少女峯腳下。仲有隻唔係垂死嘅獅子像tim！

loo loo loo.....到Fes可以停低啦~真係Ho!My god!同你講唔攰都無人信。司機好細心，幫我地call酒店，叫服務生出黎接我地，要自己搵都有D難度。登記期間，提供好味道Welcome drink and snack，佢地個椰絲酥唔太甜，令少食椰子味食物嘅我都心動，馬上回魂！

 

我地係Fes第一間住嘅酒店係梁彥宗介紹過，由嫁咗過摩洛哥嘅香港女仔個老公開嘅酒店 - Dar Borj

 

服務生係一位俊俏嘅黑人，好投入咁介紹酒店每一個角落，因為地板、天花、木門分分鐘都係14世紀留落黎。有部份門窗係新做，廁所熱水都好足夠，床舖被單係用高級全棉提花布，認真用心設計。

高級床舖被單，唔係肚仔餓已經涼沖訓覺😴

翠絲話係我地間Dar隔離有間好出多嘅cafe clock，食嘅時候都唔知佢間舖咁有歷史背景。

第二朝local guide都有介紹舖頭外牆係歷史悠久嘅水鐘，每一個有水流動嘅窿代表一小時，餐廳老闆以此起名為Cafe clock。

摩洛哥貓多狗少都有原因，捉老鼠捉昆蟲就一定，原來D狗見到揹住貨行嘅騾仔會驚，騾仔比狗仔嚇親撞到人就大件事。當地人覺得狗比較污穢，可能同隨地痾屎尿有關掛，就係咁養貓嘅人比較多啦！貓咪咁大功勞，我地食飯加多雙筷又點話。

Cafe clock出名嘅駱駝肉漢堡，由漂亮嘅媔娜試食！口味係重些少，一個人食食下都有D滯。最後由享利仔KO咗大半個包。享利仔話，今朝騎完佢，今晚就食咗佢，成件事太嘔心，點解要叫駱駝漢堡，唔食埋佢又浪費😭 加油啊！我地陪你一齊食............牛肉漢堡😂