日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah
我哋嘅旅程由食飯吹吹下水，由兩個變三個，再組成五人團而成行，最初係話cheaper cheaper變成買到破產摩洛哥，真係持住換到8.9歐而放肆。因香港無durham換，我哋只能先換歐元，去到當地再換。電話咭同樣地無得買，去到Casablanca機場先拎免費電話咭再增值50 durham已足夠兩個人share瘋狂上網用。
航空公司揀咗Etihad airline，由香港到阿提哈德轉機去Casablanca，加埋轉機差唔多用咗20小時。無計啦！最平係佢，比4千幾蚊飛咗半個地球。如果再揀一定唔會揀呢間航空公司，唔知係咪飛機餐有問題，定係架機夠飄而暈浪呢？食完無耐就開始嘔咗成程機，好彩之後無事，無影響行程。
買好機票後翠絲幫忙搵資料約撒哈拉沙漠團，因為我地其中一位朋友係台灣人，怕申請唔到摩洛哥visa，想沙漠團間公司幫我地申請，結果只係比到一張參與証明信，visa都係要自己處理。
到咗摩洛哥我地係機場會合當地司機。佢係一位生於撒哈拉沙漠邊陲地帶嘅柏柏爾人大叔，外表雖然唔英俊，但夠曬細心，成個行程多得佢睇住我地。開始時都有考慮過自己搵車坐定係包車好呢？計計下日子，12日裏面我地只有9日玩，恐怕自己坐車走唔完一個圈。而且有5日都要坐3-6個鐘車，唔少景點係公路旁邊。最後叫咗沙漠團老闆幫安排包車+沙漠團食宿+每個城市有4小時嘅導遊，每人大約290歐元。
好彩係黎呢個乾燥的國度，20個鐘無沖涼馬上去參觀，唔係個個都接受到XD
坐飛機坐到屁屁痛，第一站梗係去行下。摩洛哥最大清真寺，非洲第二大清真寺，世界第五大清真寺 - Hassan II Mosque (哈桑二世清真寺)。由法國建築師設計。正面遙望著朝聖地 - 麥加。矗立係大西洋岸邊，刮起嘅白頭浪隆隆聲咁打向石頭。我地到嘅時候刮起大風，連大鐵板都吹起咗。
內裏好大嘅祈禱禮堂，可容納25,000人。屋頂設計可以開合，好似話每日12點正會打開，當然係無落雨嘅時候啦！
圓頂、馬蹄形拱門和裝飾天花板嘅Muqarnas。
Muqarnas係伊斯蘭建築中嘅一種拱頂裝飾，通常用於入口嘅供門頂。禮堂下面設有浴場。
為咗慳，我地係機場無換到錢，諗住出到市區先換靚價。點知星期日無乜舖頭開，得一間銀行比我地換得EUR50。差D連食飯都唔夠錢。司機見我地一蚊都無可能都驚驚地，成班窮L😅
第一擊good food本身感覺幾好，食物都OK唔錯。但係....慢慢食落...就發現呢間餐廳好環保！！枝膠飲管係Recycle、包裝茄汁開過都Recycle、麵包都Recycle😓
行完景點，食完午餐就開始狂風大雨，Casablanca任務完畢。我地就要坐3個幾鐘車向Marrakesh出發。
一路開車黎到Majorelle Garden，沿途風景都係荒漠，人煙稀少。出發時睇過Marrakesh吸引我行嘅景點唔多，Majorelle Garden感覺只係好普通嘅花園。咁順路經過.....我地就入去參觀下好有名氣嘅YSL故居啦。
花園內有一半係種仙人掌及多肉植物，另一半帶有東方風味，種咗竹和蓮花。成個花園用咗原色藍黃紅色，鮮明吸睛，好有蒙德里安畫作feel。花園第一位主人由藝術家Jacques Majorelle擁有。到20世紀80年代，被時裝設計師Yves Saint-Laurent和PierreBergé收購，佢地將欠缺管理嘅花園回復今日面貌，一直住到終老。
係Marrakesh和Fes嘅Riad大部份都好吸引、好靚，都係由古宅修復而成。話說Riad係當年D有錢佬起嘅屋，外表個個都差唔多，都係一幅黃土牆，政府有規定房屋外表，無論幾有錢都唔可以在外牆過份裝潢。
但當你入咗小木門後就係另一個世界，會豪裝，金壁輝煌。Riad嘅庭院一般會有噴泉或水池，周圍要種有花草、樹木，有兩層或更多樓層。
另有稱為Dar嘅古宅，比起Riad規模細，通常只有馬賽克砌成嘅噴泉，房間數量比較少。左揀右揀後，決定訂Riad Bindoo。我第一次住有兩層嘅酒店房，包埋美美嘅早餐和環境。
廁所都好靚，比我屋企個廳仲要大
朋友嘅房間佈置成另一種風格
食早餐嘅地方係天台，朝早會見到比我地酒店矮少少，又密集嘅平房天台，環境好靚。早上都幾凍，要著外套，仲有好多蜜蜂搶食果醬。
食多幾日就怕怕嘅早餐，每間酒店都一樣，硬硬乾乾嘅酥餅或玉米餅🙊
大家都好攰，本身想係酒店食，可惜佢必須要預訂。唯有出去行埋 Jemaa el-Fna睇下有乜好。我地揀咗間睇到成個市集嘅餐廳天台，食住Tanji欣賞日落💗
呢個就係第一餐嘅Tanji 塔吉窩，有好多唔同肉類可以揀，我地保守地揀咗檸檬雞，同埋當地名菜北非小米飯Couscous。
呢盤野唔討好我地5把口，以後嘅日子無再叫過北非小米飯。但我估係呢間餐廳整得唔好食，之後嘅旅程，我地食過比呢間好食一萬倍嘅塔吉窩。北非小米飯應該仲有翻身嘅機會。
豬仔嘅我地，以為60 durham 六枝水好平。少年你太無知！正常價係40 durham 六枝咋！少年又以為4 durham 一杯橙汁好平？日日朝早唔洗錢有得飲tim la！D遊記介紹買乜鬼橙汁啫？不如介紹下飲紅石榴汁啦！話可以美白抗衰老，仲有降膽固醇，減低患心臟病風險，係血管清道夫，維他命 C係奇異果的嘅三倍。同行朋友有飲開，話紅色嘅石榴係香港賣40幾蚊一個。我地係路邊買咗2杯，用壓榨方式榨汁，差唔多用4個先做到一杯。另外，見過有D舖頭先起咗D籽出黎，用搞管機打成汁。
沒有留言:
發佈留言