12日買到破產摩洛哥@Day6 Dadès Valley, Todra Gorge, Merzouga Desert

日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou‌> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah

食完成個旅程最好嘅早餐後，司機順便帶我地上埋山頂，睇下Dadès Gorges河嘅源頭，google map 顯示呢個觀望台叫Vue Panoramique Timzzillite。

山頂上有間好好view嘅酒店

呢條Dadès Gorges瀑布起源於Grand Atlas Mountains，向西南方流動，經過Ouarzazate 河最後流入撒哈拉沙漠邊緣嘅德拉河。Grand Atlas Mountains係摩洛哥向東延伸至阿爾及利亞邊境嘅山脈，最高山峰海拔4,167米，成為天然屏障，阻隔西大西洋濕氣吹入內陸。

途經某小填，司機停低比我地影下相，可以睇到荒漠中嘅綠州，我估綠州入邊嘅河流就係Todra River。

又到某個影相點，影影下相媔娜問"呢D喺咩樹?" ；享利仔肯定咁話"呢D係香蕉樹" ；我地唔信，打賭5歐元。司機話呢度大部份都係棕櫚樹😂

去到Todra Gorges司機比我地落去行下短短嘅山谷路影下相。我覺得有D似去咗新疆入南山區會經過嘅山谷。

最高有600米嘅峽谷由石灰石組成，旱季呢度只會有一條小河。

一路黎到食午餐嘅地方都係差唔多嘅景觀，餐廳老闆知道我地係香港人後，話有個香港女仔嫁咗過呢邊。我地都覺得不可思議，呢邊同香港比實在太荒涼，我地講笑咁話個男仔一定好靚仔，迷剉港女過黎定居😁

老闆特別介紹自己嘅麵包係阿媽親手做，佢地嘅摩洛哥湯幾好飲。同様嘅湯去到唔同餐廳，煮法同味道都似乎有好太差別。摩洛哥食材雖然單一化，但係同樣一味菜我地從來無食過相似嘅味道，每個廚師都有好強嘅個人風味。唔似係香港食快餐😏

佢地嘅飯真係不敢恭維，好軟好散嘅口感，無論係邊度都係咁難入口。

比原定計劃遲咗~差唔多近黃昏先到Merzouga，係接近撒哈拉沙漠嘅一個小鎮，大行李寄放係酒店。幫我地包包包完頭，出發囉😂

由呢度坐半個鐘駱駝就到帳篷。我地訂嘅沙漠團係普通帳篷，有廁所但無得沖涼，包早餐及午餐，床舖。拎貴重財物及相機入去就OK，

我坐嘅駱駝可能係女仔，一直用頭摔坐前邊嘅阿菜，向佢示好啊？對我就係微微轉頭"bai"住。到媔娜坐佢時，仲咯咯叫唔肯起身😂

路上司機問過我地玩唔玩沙漠吉普車，話可以幫我地R discrount到40幾歐元一駕車，可以坐2個人。我地考慮咗好耐，因為身上嘅現金唔多，要小心用錢。

遙下遙下，突然好大風沙，吹到入曬眼，連包住相機嘅保鮮紙都吹甩埋。

天氣唔好，影唔到靚靚嘅天色同駱駝影子，人地話撒哈拉嘅沙特別金黃，無太陽嘅幫助有點失色，唯有等聽朝啦。

滑沙板免費隨便玩。係呢個時候帳篷老闆出現啦~即係司機嘅堂弟。問我地玩唔玩沙漠吉普車，開出比司機介紹果間公司較貴嘅價錢，我地有一刻心諗係咪申水？老闆解釋有好多間公司提供沙漠吉普車服務，佢幫我地打聽返黎話係間新開嘅公司，做緊折扣，所以就訂聽日6點15分開車睇日出吶！

是日有靚仔哦爸餸塔吉窩，話說人地玩咗backpack咗半年💓

仲要係韓國個game artist，我都唔執輸梗係借機握下手，話我都做過game artist嫁😁
認完同行、食完餐飯、再傾下影星，話題已到終點站......靚仔哦爸無法用簡單英文溝通，完全靠佢嘅台拳道教練女性朋友翻譯。咁.....你哋唔好阻住我影相啦😬

今晚月亮又大又圓，想要影清晰明顯嘅星河有困難，影星軌都仲可以。係沙漠邊皮嘅光究竟係咪光污染定呢？😗

影星有好多學問，我從來都無深入了解過，今次去完摩洛哥返香港，開始簡單了解一下星體和影星技巧，都認真考慮要升級手上嘅相機。話說之前我都只係用canon350D，今次帶咗canon650D+1022mm鏡，相比同行朋友我嘅稼撐係最舊最low teach，有朋友更驚訝我仲用緊350D？！ummm.....其實我真係有諗過帶350D嫁😁

入夜唔係好凍，但係越夜越大風，吹到人都癲。第二朝要6點15分睇日，我1點左右就訓。阿菜為咗影靚相吹到零晨2點先訓，4點鐘佢又set咗鬧鐘起身影相，5點幾又set 咗鬧鐘起身影日出，其實北非個太陽都幾懶，成7點幾先出黎，嘈到翠絲同我都發皮氣😤😤