2018年3月16日星期五

周遊東京●4日3夜 Day1

短短五日嘅行程係16/3/2018-20/3/2018間成行,太遲買機票加上三月櫻花期關係機票特別貴,為免坐HK express會有延誤或航班被取消,只能選擇廉價嘅香草航空。雖然話去五日,實際第一日去到東京已經半夜,回程到港時已經係第五日零晨。不過無所謂啦~有史雲遜出機票錢,請佢爸媽和我一齊去東京周圍食,順便同我慶生。
咁大個女其實都未試過同人地阿爸阿媽一齊去旅行,起初都有少少唔習慣,好彩佢屋企人都易相處,大家都目標在搵好食嘅野。有老人家一齊,行程唔會去得太遠,雖說唔遠,日日舟車勞動我都覺得佢地幾攰。第一日行程,由香港飛到東京,坐地鐵到新宿已經十一點幾。
今次訂咗新宿CABIN酒店,貪佢座落係不夜天嘅新宿。Check in後馬上出去搵食,沿途途經好多食店都係韓國餐廳,亦有日式快餐和拉麵店。最後我地非常趣緻地揀咗食韓國野。
心諗唔知會唔會中伏,入去試下咪知囉。叫咗醋雞水冷麵、溫麵、烤雞、泡菜炒飯。估唔到又驚又喜,幾好食喎!至少係香港搵唔到咁高質素嘅韓國餐廳,仲令我到而家仲掛住佢個醋雞冷麵。第一日就係咁坐下迫迫窄窄嘅香草到左東京,食飯訓覺等第二日出發。
非常出色嘅醋雞冷麵
同樣出色嘅烤雞,看似乾身,但肉質依然軟滑夠入味
泡菜炒飯係幾好食,少少辣,似燴飯