2015年5月24日星期日

口吃上深圳@4A好去處

事隔一年,大牧羊仔仔、小雪 、Wing又到深圳遊,為慶祝小雪要搬家到新環境,而且工作又開展新一頁。話說兩星期以來一直下着狂風大雨,為了今天的約會順順利利,我們帶了掌管雷雨的打雷姐出行!就是這樣四個available的女生出走香港一日咁多啦!
我們三人約好在上水火車站等,而小雪卻遲到了~我們一直站在深圳地鐵等她,還在開玩笑說,是不是她減肥成功...瘦到認不出來?不久.....小雪終於在人群中現身......依舊的老樣子啊XD
辛苦了小雪做東道主,帶我們吃吃玩玩!先到華新站,本來去鳳凰樓飲茶,可惜要等百幾張枱,等了兩小時還有一百多張票才到我們,實在太可怕!最後,轉了個彎到旁邊的春滿園,等了半小時就有位了......唉唷.....做麼在香港和深圳飲茶都這樣難呢?! 
春滿園評分比鳳凰樓低一點點,不過食物都不錯呢,款式多又有茶具給大牧羊自娛,不斷地幫我們添茶。我們點了生煎包,這個一般般。
 還有紅棗糕,南瓜和香芋做的煎飽,芒果汁配淮山,芝士香芋糕
 炒粿條,蝦餃,煎豆腐。等了兩小時,但半小時就吃清了所有點心了......香港人!慢活慢活啊!
小雪再為我們安排了深圳區的香港版4D真人密室逃脫,才rmb50每位,比香港便宜很多!好~去看跟香港的有什麼差別啦!其實跟香港大同小異........有趣的不是這個密室,有趣的是我們幾個傻傻的在裏面不知要幹嘛!!我們花了很長時間在開一個錯的盒子,連工作人員也看不過眼,給了我們好幾次提示,還加時再加時。最後我們還使出小聰明,沒按照流程去完成遊戲。
密室逃脫花了好長時間, 還以為按摩環節要取消啦!英明的小雪在大眾點評訂了一間距離晚飯地點比較近的按摩店,才....才rmb70加小費rmb50,合共rmb120。按摩了全身和鬆腿,另外還包韓蒸等。小雪和大牧羊看到一堆堆石子的韓蒸都走進去玩了一會。在裏邊的靚太說韓蒸比sauna好啊!不是短時間把毛孔一下子擴張,而是慢慢的溫熱把汗迫出來,韓蒸後四小時內不要沖涼,只要毛巾刷走汗水就好!靚太說蒸完皮膚又滑又光亮。真的假的啦?小雪走吧~再蒸你要溶掉啦!
 晚餐是我們期待的川菜,夠地道的麻辣味,好喜歡他們的酸辣粉和四寶茶。到達時已經快要十點,人家都要關門啦!好吃的菜也賣完了。
 想回味烤魚的我們,服務員說賣光了。那...要泉水雞吧!小雪說這是重慶很地道的菜色。他們用的是烏雞,很有口感!不過今次香菇和雞只有很少件,吃得不夠爽,我們幫他找借口說是快關門没材料了T_T
好啦~好啦~什麼都賣光了~點樟茶鴨,又没有了?哎呀~要一個口水雞和粉蒸肉夾饃吧!
一碗酸辣粉和一碗小麵線,小雪話在重慶的時候會去光顧Top 10小麵線店舖,家家做辣都有不同味道。甜品再來一個蛋煎粃粑。幸福的一天!又飽到中秋!
由坐的士到口岸,再坐火車回家,都有蠢事發生。的士司機的自言自語嚇到了我們,司機也察覺到來安慰了幾句。再來衝自動門......頂!自動門啊!衝個屁啊?後面的阿叔阿嬸又跟着我們衝,痴線啊XD

2015年5月17日星期日

Day3 四日三夜養生團-Amerzon Basin

日期:24/3/2015-24/4/2015
行程:Puerto Maldonado>Amerzon Basin (Tambopata National Reserve)
可能係時差,4點幾已經起身係hostel閒遊,等待7點鐘食早餐。未出發前見到台灣旅人托比哥在Arequipa學煮地道菜又學做朱古力,引死人啦!見到黑板寫住cooking classes真係好想去完阿馬遜返黎學返堂!不過算啦~這些機會不是我的!留返下次先吧!
大家有無留意標題打住Amerzon,之後又要括弧打埋Tambopata National Reserve呢?嗯~係我做功課時都睇到頭都大嘅問題黎啦!話說亞馬遜真係好大好大,真係地球個肺,橫跨左八個國家,包括巴西、哥倫比亞、秘魯、委內瑞拉、厄瓜多尔、玻利維亞、圭亞那、法屬圭亞那和蘇利南。話說新版寂寞星球有加入九頁(咁大吧)講解蘇利南,偶都好想去一下這個生物多樣性嘅小國唷(✪ω✪)

地方咁大,我等蟻民入去做個深層保濕(痴線濕度一定有98%囉),必須要跟團或同Amerzon內嘅Lodge聯絡有人接應先得嫁!係搵料其間出現左三個好陌生嘅地方名,分別係Tambopata、Manu、Iquitos。呢三個保護區位於不同地點,而睇嘅生物各有不同,價錢差異亦好大。


Tambopata
行程:2D1N-5D4N都有
價錢:usd90-usd380
位置:Lima坐1hr 飛機或Cusco坐12hr 巴士可到達附近城市Puerto Maldonado
選擇原因:咁多個保護區比較之下最經濟!又有金剛鸚鵡食泥睇,而黎呢度食泥嘅金剛鸚鵡數量較多
主要睇乜:Macaw clay lick(金剛鸚鵡食泥)、Parrots(鸚鵡仔)、Caiman(凱門鱷)、Lake Sandoval(牛噹噹湖)、藍蝶、切葉蟻、食人魚



Manu
行程:網上看到最少4D3N
價錢:每日usd100
位置:Cusco坐13hr 巴士到Alto Madre de Dios再坐約8hr船往Boca Manu
選擇原因:無咁多日去阿馬遜
主要睇乜:能睇比較多動物、Macaw clay lick(金剛鸚鵡食泥)、沙灘搭帳棚、藍蝶、河鼠、凱門鱷、水獺、食蟻獸、切葉蟻、食人魚


Iquitos
行程:3D2N-4D3N
價錢:???
位置:世界上無陸路到達嘅最大城市,只能坐飛機或坐4日船入城
選擇原因:太遠....
主要睇乜:參觀當地文化和原住民、粉紅色淡水海䐁、藍蝶、凱門鱷、切葉蟻、大嘴鳥、食人魚



Day 1-Chuncho Lodge
食完好豐富嘅早餐,Tarantula嘅人大概9:00am黎接我地出發啦!帶我地嘅導遊叫Timo,佢自我介紹嘅時候,我問左個勁無聊嘅問題「你係咪係森林出世嫁?」,而佢都無奈地笑左出黎,佢話佢家鄉都係Puerto Maldonado附近同玻利維亞好近嘅小村莊,佢好似話大學係修讀 #%@#%^*唔知乜系,所以做左阿馬遜導遊吶。我地返到Tarantular嘅公司(其實係佢地開嘅hostel)寄存大背包就會深入叢林啦!原本以為會有其他團友,點知4日3夜阿馬遜得兩個人。呢刻心諗,哎呀.....我D英文屎到爆,無D 西語系或講英文嘅團友去分散導遊嘅注意力,我咪要打醒十二分精神去留意人地講乜問乜.....仲要咁多生物+植物名都唔識......呢刻真係後悔年少無知唔讀好D讀!
司機開住一台4WD行走泥濘路2小時,中途好幾次車胎陷入泥巴,要落車幫手推車,直到有一次車完全無法前進,我地要自己行到河邊碼頭,好彩餘下路程無好遠,就只差30+分鐘。

途中遠觀鸚鵡和猴子
碼頭其實只係有條小船停係泥地邊嘅地方,坐多5分鐘就到達今晚落腳點Chuncho Lodge。
只能夠講.....成間lodge只有我地兩個客人,其他出出入入嘅男人似乎係幫手起屋,還有一位我覺得佢係女人嘅廚師。而呢度似係由森林岩岩開闢出黎嘅一片空地,周邊會見到好多被斬但未整理好嘅樹幹或斬淨嘅矮樹。
lodge內二樓未完工,一片灰塵。我地嘅活動,沖涼,食飯和訓覺都只限於一樓。晚上有限度提供燈光,當然唔會有冷氣,都好難想像30幾度可以唔開冷氣訓得到,到零晨時分仲有D寒要冚被tim呢!沖涼水係由河引入黎無經過濾,所以有少少味道,um.....少少腥咁啫,哈哈哈!洗完頭D頭髮會癡埋一舊舊,個身有少少笠.......可能天氣熱者,基本上比預期中好,至少沖涼時無隻大甲蟲企係我背脊先啦TvT
神奇的牛肉配豆.......會令人有密集恐懼症

午餐後休息到3點左右,避開左最熱時間先出去走一圈森林,睇到嘅動物有啄木鳥和黃色蜂鳥,導遊想帶我地睇一隻貌似大型老鼠嘅動物,讀音似"whitebit",卻只聞其聲不見其影。而昆蟲就只有好多蚊蚊蚊......

好多樹上都能夠發現呢D啡色一片片,仲要一大舊,原來係白蟻......
換蛇皮~woooo  ∑( ̄□ ̄;)
無毒小蜘蛛.....
希望.....我無記錯(๑¯∀¯๑)
呢D一條條泥柱係好似黑蜂咁嘅昆蟲築黎孵蛋嘅巢,佢地嘅特徵飛嘅時候好嘈......VeeVeeVee聲
如果無記錯或聽錯,呢棵樹係依附性,佢會依靠一棵已亭亭玉立嘅大樹,癡住佢一路向上生,生到最高點直至完全包圍宿主,令原本嘅大樹吸收唔到陽光而枯萎。所以呢種樹中心位係空,因為原有大樹已枯死分解左......好得人驚wooo.....@_@
導遊Timo話只要認住佢D根就記得佢個名叫Walking tree,因為森林競爭大,要爭取吸收更多嘅陽光,樹都要學識走位!主樹幹會跟隨新生出黎嘅根部一齊移動到光線比較充足嘅位置,當然佢嘅移動速度和距離其實不是很大
Um.....早知唔洗打黃熱針啦!有乜頭痛發燒,中左黃熱,拎呢種花去煲水飲就好嫁啦!導遊再三提醒粉紅色係for咩咩咩病,黃色係for咩咩咩病.....sorry......我真係記唔到XD
呢一坑泥漿.....同一D奇怪嘅叫聲.....乜都睇唔到就行完叢林lu。仲要唔記得左隻野叫咩名,只係記得話好似老鼠咁嘅樣,不過大隻D嘅,佢鐘意每日黎呢度玩泥漿嘅!我諗緊........係咪水獺啊?
係秘魯除左盛產咖啡豆和茶葉,朱古力豆亦係其中佳麗,左邊係朱古力豆嘅真身!右邊亦係亞馬遜盛產嘅Aguaje(應該無錯吧?!但睇落好似比正常嘅乾身)係棕櫚樹嘅果實,每年12月至6月當灶,就係我地成日講嘅蛇皮果,表面包住啡色蛇皮紋嘅光滑外壳。
啄木鳥(Woodpecker )係lodge前很遠很遠嘅一棵樹上,要用望遠鏡先影到呢張相。佢地啄木嘅頻率好密,而且迴音非常響亮,整個森林都聽到。有趣嘅係啄木鳥嘅舌頭由頭骨後經過,由鼻到嘴尖,呢種結構可以令舌頭伸出更多,舌尖生有短鈎便於鈎食樹幹內昆蟲
時間夾得剛好,返到lodge無耐,即刻落大雨!咁聽日會落雨嗎?因為金剛鸚鵡要好天有太陽先飛黎食泥,落雨就無緣lu!
食住比想像中理想!有湯+主菜+甜品+亞馬遜特飲Maracuya,即是passion fruit
茄汁雞胸配油飯.....笑得好開心嘅「女」廚師都煮得一手好餸
這個嘛......我改個名比佢做懶懶蛋布丁,係咪即刻想食呢?有少少似椰汁西米露.......正到呢(´≖◞౪◟≖)
我話係養生團係無錯嘅.....7:30pm晚餐後無事做,無電視睇,無得上網,無得出去行,唯有早睡早起,9點訓3點起身,準備聽日睇Macaw clay lick,亦希望天公做美出太陽吧!

2015年5月10日星期日

Day1-2 夢想首航-Puerto Maldonado

日期:24/3/2015-24/4/2015
行程:HK>Dallas>Lima>Puerto Maldonado

簡單而又難食嘅飛機餐,卻令我食出人間溫暖......
大佬!人地真係好耐未試過坐飛機有餐食,有毯
啊嘛!!
差一千蚊,比你㨂坐Delta定American Airlines?纖瘦嘅P朋友話Delta座位好窄,坐得好辛苦.....就因為佢呢句,我決定比多少少錢坐AA!又有飛機餐,又有電影,又有酒水任飲......呢刻先發現我好耐無坐過咁舒服嘅airline!只係我枯寒一直都坐廉航,先係度大驚小怪啫。
雖然訓到睡眼惺忪,有得食就梗係要醒啦!
呢程飛機絕對係我人生坐得最耐嘅一次,香港出發到美國Dallas轉飛利馬好似17hrs左右,轉機去到Lima大約7hrs。總共花左24hrs坐飛機。如果計錯數唔好怪我,咁多個鐘我真係唔識數手指XD
講開Dallas轉機只有1hr走盞,者係話...如果勁多人出入境,又要自己拎行李再check in,加埋我下拾下去錯閘口,唔睇住班機走都偷笑。所以出發前再三問多次航空公司係咪真係得嫁?真係夠時間?之後人地回覆「係啊!真嫁!得Dallas可以咁轉機咋!你記得要check轉機洗唔洗show visa啊!」咁好啦!錢都比曬,仲唔信你咩
嗱嗱嗱~講埋USA Visa先!我都一早申請左啦.....手續話易唔易話難唔難,就係上網填好曬資料,Print MRV Fee Payment去7仔交錢,約埋見面試官嘅時間。請定假,到時帶齊MRV Fee收據+預約面試張紙+公司放假信+護照咁就得啦!過1-2星期會收到通知去順豐門市拎返護照。收到時幾擔心啊!搵黎搵去無簽證係passport入面嘅?!唔係掛~比左hkd1280嫁!幸運係....其實人地批左10年visa比我,眼大睇過隴者.....
利馬國際機場-Aeropuerto Internacional Jorge Chávez
煲劇、食同訓咁就過左10幾個鐘,輾轉去到利馬已經零晨1點。要係機場再等多7hrs,等待嘅時候,原本想買張sim咭上網,雞同鴨講之下搞左成個鐘都唔得,所以往後嘅行程都係要靠自己係hostel搵好曬路先出發!
7:35am終於可以上star peru啦!直達今次行程嘅首站Puerto Maldonado,中文翻譯為馬爾多納多港,係馬德雷德迪奧斯大區(Madre de Dios)嘅首府。位於秘魯東南邊城市,由利馬坐飛機約1hrs到達.。Puerto Maldonado同玻利維亞係接壤嘅邊境,坐巴士去玻國只要跨過Rio Madre(河)上嘅紅色橋,很快就到玻國最近嘅城鎮,我忘記阿馬遜個導遊話坐45min還是1hr30min呢?!而坐船亦可以到達邊境嘅帕爾多港(Puerto Pardo)
原來,去玻國呢條紅色橋好有來頭,係連接大西洋和太平洋並經過巴西嘅越洋公路(Interoceanica hwy),只要2hr30min就到達巴西。
上車最緊要講價!
利馬嘅天氣清爽,但到Puerto Maldonado後,馬上變成潮濕嘅熱帶氣候。初黎報到比人搵笨都預左,問乜個司機都si si si(yes咁解)不過明明講好左嘅車資,就因為我去Tarantula比埋Tambopata jungle tour尾數和訂埋去cusco嘅夜車時,要佢等左好一陣子,先再到hostel,所以司機由s/10加到s/20......哇!搶錢咩?!
Tambopata Hostel
Av.26 De Diciembre, Puerto Maldonado, Peru
+51 987 590 164
出發前係手機download左好幾個訂旅舍嘅app試用,個人覺得Booking.com幾好,介面清晰,而且由平價hostel至豪華特式酒店都有。坐左飛機咁耐應該都攰,所以首站我想安全穩陣,我經booking.com訂左間平靚正嘅dorm,只要usd11,早餐仲有炒蛋+麵包+咖啡或茶
放好背包,玩完紗網同鮮豔吊床,梗係即刻沖涼,洗走兩日嘅老泥,講真我無太在意水係冷係熱,因為天氣夠熱完全接受到沖凍水涼。
hostel亮點~真係好正!咩叫藝術?!
我就係咁衰,只要鐘意就真係可以愛屋及烏,食屎都覺幸福,呢度D蚊多到爆!都要坐係度寫日記,飲杯水仙,早知學下對意大利情侶坐係度打邊爐,咁咪乜蚊都無囉!

隨街可見嘅牆壁都滿有美感,我愛你秘魯Σ>―(〃°ω°〃)♡→

午飯求其入左間地道餐館,一份餐有湯,有飯,有芬達只要s/7,者係hkd17.5。

仲有個原因,令我愛秘魯再多一點......
愛狗愛貓愛動物嘅人,你會覺得佢好有愛心,但如果一整個國家嘅(大部分)人都愛惜動物,咁善良咁仁愛咁能包容不同物種,實在難得!可能陰暗面我未係呢33日睇到,但最少呢33日我見到好多流浪狗都可以隨意走或睡在大街,途人行過都會摸摸牠們後離去,就算有狗仔死都要走入銀行,保安員都唔會打鬧佢地,只會用腳不斷地輕輕攔截狗仔入內。
原來呢間真係正野!最初hostel介紹黎呢度食,見價錢都唔平wor!以為夾埋搵遊客笨,但經過兩、三個人都介紹呢間餐廳後........我有少少後悔無食佢lu......
plaze de armas遇見非洲物種?!
秘魯每個地方都有plaze de armas,即武器廣場,係該區市中心。
下午行經plaze de armas時見到超平3日2夜Tambopata jungle tour只要usd200。比較係香港網上預訂嘅tour平usd180。 為左唔洗第一日要周圍搵tour,所以比貴D預早booking。如果時間充裕,真係黎到先訂tour和旅舍都無有怕!
第一晚梗要食豪D順便慶祝生日!㨂間食烤雞串燒嘅餐廳順便慶祝生日,埋單s/80,大約hkd200