日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah
趕趕地走一圈摩洛哥，留得最多日係Marrakesh，佢有好多吸引嘅Riad、Dar、高級餐廳，但都有煩人申水嘅商人。如果要買手信，我唔建議係呢邊花費，好多貨品都係黎自中國或其他亞洲地區，可能我地去轉泰國都會買到條平30蚊港幣嘅棉褲。摩洛哥手工藝品又購自Fes。感覺呢個城市嘅性格就係為錢而存在。到止一遊就夠啦。
食咗2日早餐，日日都有蜜蜂搶食，今日試下移入室內，小蜜蜂都跟埋入黎，真係嚇死寶寶！！唯有用個果醬蓋"cup"住佢係入邊慢慢食橙醬。話說摩洛哥D橙果醬係幾好味，話係加咗有苦味嘅橙wor😀
司機話D水晶係假野，唔好買啊~
今日車程應該唔止google map顯示嘅5個半鐘，坐左2個鐘一半路程都未到。山路路況唔好，坐到我地個胃頂住頂住，享利仔忍到落車終於要嘔啦😱
又乾又曬嘅正午，感覺開始接近沙漠邊陲，企15分鐘有感皮膚刺痛。
L'oasis D'or係司機介紹我地去食嘅握手黨餐廳，睇落個門口完全唔似有野食，係google map都有3.6評分，都唔錯咁wor。但~係~呢條村似乎得3間餐廳，佢係最低分嫁😂
睇落隔離枱D野都幾得咁，唔似會中伏。好啦好啦~我地叫D野到啦~今次去旅行，我好保守，叫咗碟串燒雞肉，味道正正常常，就係奇怪D雞肉點解會爽，食到0索0索聲。應該無咩事嘅，爽啫😂飲返杯可樂定一定神，送串燒。
今日唯一景點近在咫尺，正正就係餐廳對面，食飽咗我地個胃仲係飄下飄下，好似坐緊車咁，行下係好嘅安排。係wikipedia睇到柏柏爾文係好得意，Ksar of Ait-Ben-Haddou寫作ⴰⵢⵜⴱⴻⵏⵃⴰⴷⴷⵓ
同Marrakesh一樣，係 Ait-Ben-Haddou有位地陪，帶我地走訪及介紹呢個仲有4戶人住嘅古城。佢介紹自己係生於呢個古城，但而家已經搬咗出黎住河對面嘅屋，因為古城入邊無水無電生活比較艱難。
Ait-Ben-Haddou建於17世紀左右，佢地嘅屋係用木做橫樑，乾草混合泥土，有時會加動物糞便增加粘貼力。3層樓都係咁做，想知多D可以睇下呢條link: https://whc.unesco.org/en/list/444
local guide動用握手黨能力，帶咗我地入去睇有人住嘅屋，仲上埋天台參觀，行路真係要輕輕力，翠絲係天台跳咗下，天台地面係度震，好似跳多幾下會穿咁😨
向山頂小屋一直行啊行，呢邊賣嘅衫褲比較Marrakesh見到同款嘅平少少，但係我地無時間停落黎。司機梗係同guide溫馨提示咗，呢班喪B好鐘意hea，要快D帶我地行完返黎趕路。
guide都好留意時間，唔帶我地行得太遠，一直帶我地衝上頂峰，影完靚相，快速行返去會合司機，繼續開車趕去Dadès Vallei。
咁趕做乜鬼？司機心中有數，我地呢班喪B又加多咗買玫瑰油景點，都係順路啫，係正大路旁邊，停留咗半個幾鐘左右掛，又買咗成千蚊野。翠絲出招講一講價，叫佢送2盒玫瑰花乾+1枝玫瑰水，原本個sales都唔想送，可能見就收工，收錢個靚女就示意送啦😂
開咗成日車到咗Dadès Vallei，沿路都係酒店，仲以為差唔多到。司機一直深入山浴，由黃昏開到天黑，左彎右彎係咁走一條無盡嘅公路，果刻個心都有少少淆底，我地究竟去咗邊？司機都講笑咁問我地間民宿係邊啊啊啊啊？佢知嫁，嚇下我地咁囉😀佢話我地間民宿係山谷最尾一間屋。聽到都覺得浪漫！仲問我地點解會搵到咁入嘅屋？(因為booking.com搵到又抵又高評分囉！)
民宿叫Auberge La Fibule Du Dades，地圖顯示位於Aït Idaïr，係正Gorges du Dadès條馬路隔離，果然係山谷最後一間屋。我地驚死無飯食，叫司機唔好走住，問下老闆有無飯供應。個天果然對我地好有愛，民宿老闆煮嘅塔吉窩係成個旅程最好食。係咪天氣乾到爆影響，連碗湯都好飲到不得了。我地坐係天台，開枝白酒，享受完美嘅一餐。係山谷盡頭食呢餐，我真心覺得好舒服，好似係自己屋企咁。晚餐之後仲好有heart咁表演柏柏爾音樂。
佢地嘅早餐都係好岩口味，應該話我係摩洛哥未食過咁好食嘅早餐，帶有少少香草及孜然味嘅煎蛋，唔該encore！酒店早餐都比下去，配有多款果醬、蜜糖、阿甘油等，要黎搽麵包。到我地離開都未搵到一個塔吉窩可以超越老闆水準。由Marrakesh向撒哈拉沙漠出發，Dadès Vallei係必經之路，不妨坐車駛入山谷盡頭住返晚，幫襯下咁有heart嘅年青老闆。
沒有留言:
發佈留言