大牧羊仔仔出走日記: 12日買到破產摩洛哥@Day8 Fes

日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou‌> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah

早餐最有view嘅酒店莫過於係Dar Borj天台，而且無蜜蜂。

約咗local guide 9點正見面，我地遲咗10分鐘左，落到大堂已經見到一個好高大好似star war嘅絕地武士坐咗係度。

個樣同件長胞都有八成似佢，就差在無咗把激光劍☝☝☝😂

我地未出發已經比絕地武士迷住，由其係唔出聲嘅阿菜都話佢好正，件衫又好靚。住宿隔離就係Bab Bou Jeloud，我地叫佢做blue gate，12世紀開始使用為老城區嘅重要防禦，以前係黃昏會關門，直到早上先再開城。城外邊牆係藍色，城內牆係綠色。

絕地武士好專業及有計劃地帶我地睇景點，而且仲識好多野。翠絲問開阿甘油、橄欖油質素，佢仲介紹埋摩洛哥最珍貴嘅仙人掌籽油。話說要8噸仙人掌果，先提取到1kg油。係香港見到50ml要差唔多1千蚊，真係好貴！

Medersa Bou Inania古蘭經學校

遊Souk el Henna有好多好靚好抵買嘅手信，只係幾蚊港幣一個。絕地武士好好咁幫我地計數，驚我地比人呃。

摩洛哥經常見到嘅水源，當地人會黎裝水，話呢邊嘅水可以就咁飲，飲用嘅人仲會受到祝福。但係安全起見我地都係飲樽裝水。

呢間舖賣D野好岩我口味，但係價錢一D都唔平。翠絲買咗個千幾蚊嘅盒，係用駱駝骨配珍珠殼併花紋，非常精美。我就只係睇下好啦，帶黎嘅錢所剩無幾。

我地咁鐘意絕地武士係有原因，佢問我地知唔知呢間舖賣乜？諗咗好一陣都估唔到，原來係賣屋，我好鐘意D咁古老嘅鎖匙，如果我都有返間14世紀嘅古老大宅就好啦😂

摩洛哥式massage，幾驚入咗去要消費先走得，好彩好多都係可以參觀，睇下影下相就走。如果無跟guide諗唔會夠膽入去人地舖搞完一輪就走。

massage老闆介紹舖頭D門設計無重複，佢話摩洛哥全部野都係獨特。係唔係嫁😏

絕地武士知道媔娜同享利仔之後會結婚，所以順路介紹埋當地傳統嘅結婚用品同婚紗。新娘會坐係花橋上，由4個人枱住佢係宴會上巡遊。Moroccan Takchita 係傳統女性服裝，於慶典或婚禮會著。由兩件組成，內層稱為“Tahtia”，通常係精美但無裝飾華麗嘅織物。外層有刺繡、珠片，使用傳統sfifa和akaad扣著，叫做“Dfina”。

Fes舊城區嘅路錯綜複雜，由出Raid果一刻開始我已經迷失係呢個精彩嘅迷宮，經過又細又窄又人多嘅小巷，仲要出現摩洛哥常見交通工具-驢仔，佢背著d好臭嘅貨物行窄巷，絶地武士話呢d係未處理好嘅皮革。真係辛苦工！

兜兜轉轉行到黎Place Seffarine，呢度有好多金屬製品，主要係銅製煲、托盤。

市場中心仲有人係度揼銅片，揼出佢地要製作嘅產品外形，引黎好多遊客影相圍觀。

摩洛哥style 糕點個個都話好甜，其實食2-3件都還可以接受，配杯americano或中國茶係好正。佢地d糕點都離唔開蜜糖、杏仁粉、椰絲、糖霜、各款果仁。我好buy！

染布紡，味道有d強烈，可以睇下當地人染布，呢條街無乜特別，順路經過到此一遊就好。

所有景點都好順咁一路行，大家血併完買咗銅燈、珍珠殼骨盒後，黎到Chouara Tannery皮革廠。

天氣清涼、乾燥令臭味減弱，我地都覺得唔係網上d人講咁臭。我買咗對皮鞋返到又濕又熱嘅香港，果陣屎臭味先黎料。

入皮革廠前會送片多到唔洗錢咁嘅薄荷葉。

摩洛哥建築外表有政府嚴格規定，唔可以豪華浮誇，連招牌都唔多大個。唔講唔覺呢間係公共烤爐，話入邊d員工係最清楚每家人發生咩事，比如有嫁娶、白事、開party定係生仔，都可以從拎黎烤焗嘅野嘅數量及款式估計得到。

Lunch time 介紹我地去咗一間由絶地武士嘅朋友開嘅餐廳，入邊好靚好高級，雖然餐餐食得咁豪，有違backpacker嘅理念，只不過一場黎到唔係淨係食街邊嘢嫁嘛！呢餐豪華餐大約港幣200一位，係當地黎講好貴，但同香港比較係好抵食。

打咭、呃like值好高，食物都好岩口味。

有貴族feel嘅lunch，成個行程係得呢餐送最多前菜及水果，多到我地食唔曬。

買咗個塔吉窩返香港，我細佬叫佢做奇怪的窩，我地點咗一定無死錯嘅咸檬燜雞和大棗燜牛。呢間係好食，而唔係呃遊客嘅煲湯料質素。

串燒和Pastilla，Pastilla似係白汁雞肉放係薄皮烤焗，撒上糖粉，又咸又甜都幾得意，一個人食曬會少少滯。

穩閉嘅餐廳門口，無人帶唔知係食野😀

食完飯時間岩岩好，黎睇限時皮草交易現場！每星期得幾日，每日得幾個鐘，賣曬就散水。呢D就係我地想睇下嘅真實版摩洛哥。

左邊嘅皮未賣，所以要打開比客睇到品質。右邊賣咗，就摺埋。最高品質嘅皮會見到係黃黃地色，已經一早比人買起咗。而家淨返D有洞品質差嘅仲未賣曬。

行程大出血之地，我地買咗2張人手織嘅地毯，佢地會一張張咁打開比我地睇，而且都係獨一無二，可以話係一件藝術品。我地睇中其一張地毯嘅用色同花紋好靚，想要細張d，但其他尺寸就係唔岩心水，色差dd、花紋差dd，佢地話每張都係唔同師父織，好難copy得返一樣。

專業打包，由大大張包到細細件，唔知點解比想像中輕。

主力賣頸巾嘅雜貨店，又何包出血tim

我地行黎行去應該都只係圍繞住兩個市集，其中一個係Fondouk Tsetouanien，唔知係咪下午黎到D人放曬工，感覺比較冷清

絶地武士介紹過好幾秒呢個摩洛哥式搭棚，除咗聽得明係修繕，其他英文句子都好深聽唔明😅

路過見到好靚嘅黑色陶器定係金屬呢？仲有連司機都話肉酸唔食嘅蝸牛。

黎到呢度已經係5點幾，我地仲緊張要去買塔吉窩、買傳統甜點、睇日落，絶地武士好冷靜咁話無問題。呢間係摩洛哥傳統藥粧，連台灣有個咪咪胸嘅名模都黎過。我主要去買通鼻藥比阿媽，佢成日話個鼻唔舒服，即管試下有無效。佢地用紗布包住薄荷晶混合咗某樣黑色粉，係手按摩溫暖咗，放係鼻前吸一下。哇~陣味超勁！話有助通鼻塞、減少鼻寒，總之同鼻有關嘅問題都ok。菜嘅鼻寒好勁，幾晚都嘈醒咗我地，所以佢都一齊買咗包睇下有無用。