2017年5月7日星期日

3D trickart 的意義

意義just for fun!曾經做左半年多3D art嘅工作......好玩,但唔係長久工作 。經歷左幾年不安定生活,果陣好希望搵到份穏定嘅工......而家終於比我搵到啦!

2016年1月25日星期一

Day8 疑似Spock上身-Moray&Salinas de Maras

日期:24/3/2015-24/4/2015
行程:Cuzco>Moray&Moray圓形梯田>Salinas de Maras鹽田
交通:Inca's Connections (1day Bus Tour, s.17/ppl )


琴日嘅攰係值得,換黎今日可以一早出發去Moray圓形梯田Salinas de Maras鹽田。晨早起身要用廁所,多數都有外國人沖涼(其實我都係外國人),咁咪行遠少少個廁所,咁就遇見今日嘅除草機一號。原來hostel每日都會請黎唔同嘅羊駝黎食草,當佢地係剪草機咁一part part剪。
位於山腰嘅hostel都幾舒服,重要係沖涼夠熱水,如果唔係天氣咁涼,又係高山地區好容易有高山症。

Kurumi Hostel
Address: Calle Arcoiris 488, Cusco City Centre, 084, Cuzco
Price: US$6/night

約好Local tour 嘅帶頭人8:00am係武器廣場集合,之後行左一段路去上架大旅遊巴。旅遊巴上嘅遊客都黎自唔同嘅旅行社,大家比嘅價錢有平有貴,當地旅行社做嘅工作係一個中介人,將我地D豬仔集運,所以去到Cuzco參加乜都要貨比三家。我join嘅tour感覺都算平,約S/17包車包導遊。即係HK38左右!

Moray, Maras&Salinas需要買門票。Moray同心㘣,散買門票大約S/8。Salinas鹽田,散買門票大約S/7。計過之後會去嘅景點比較多的話,買一張boleto turistico套票
會比較抵,分別有S130/10day或S70/1day。去邊買?導遊會問你啦!之後係景點門口就買到。

boleto turistico包括17個境點: Tambomachay,Pukapukara,Q'enqo,Saqsaywaman,
Pisac,Ollantaytambo,Chinchero,Moray,Centre Qosqo de Arte Nativo音樂表現
唔知係咪本身我就有偏好印加人嘅輪廓呢?我地團嘅導遊都幾靚仔,有少少基斯杜化嘅feel ,當然係秘魯版XD
Moray係Cusco西北方50km左右,由一個大圓形梯田和兩個細D嘅圓形梯田組成。導遊話呢度係印加時期嘅農業實驗場地。利用山勢高低做出唔同嘅小型氣候區。而種植嘅多數係薯仔同粟米。不過,導遊話而家就唔用得啦!因為氣候同古印加時期已經改變左。
每一層梯田高度大約150cm,以同心圓放射栽種。係網上見到話,最高同最底部嘅溫度會因季候風同太陽嘅影響而相差15度。
導遊全程都以雙語講解,但係有好多深入嘅講解真係聽唔明佢講乜~好可惜!上網都搵唔返相關資料~

咁點解話疑似Spock上身呢?是咁的......團友C好kai咁係moray前做一個Spock招牌動作,但係佢竟然完全唔知Spock係乜水WOR!唔同呢度夠曬靈氣接通佢第六感同外太空溝通?咁印加人不嬲都好神秘又多傳說WOR!你話moray係農業研究者,實情可能係比外太空船停嫁者!個圓咪岩岩好停到架企業號囉!

黎到Salinas de Maras會見到好多手信買,特別係鹽!係市內唔覺有鹽出售,黎到呢度唔買鹽點得呢?連香港賣成百蚊一枝嘅粉紅晶鹽都有,只係幾蚊港幣咋!
Salinas de Maras鹽田,階梯狀嘅鹽田位於祕魯庫斯科北方嘅聖谷(Sacred Valley)
過去2千年,一直為當地人提供食鹽,礦物質含量非常豐富。古時呢度嘅鹽會長途跋涉被帶到馬丘比丘,用黎交換肉類或羊駝。
印加帝國建立之前,呢D鹽田已經存在?真唔真無人知LU~
而知道嘅係鹽水黎自地下泉水,濃度極高。從山上開始引流到各個鹽田,通過多個纖細引渠流入幾百個面積不足4米嘅鹽池
隨鹽水蒸發,鹽體結晶附係鹽池嘅泥墻表層及池底上。鹽池管理員係呢個時候要關水渠,等待鹽池乾透。幾日後管理員刮去乾燥嘅鹽,重新開啟水渠重複之前做法。
玫瑰鹽或是粉紅鹽,因含有鐵質,所以會呈現粉紅色或是深紅色,宛如玫瑰花辦顏色。
Sal de Maras瑪雅氏粉紅鹽介紹
https://www.youtube.com/watch?v=IG4k013-x6s
半日團大約下午三點左右完結,送返大伙兒到武器廣場附近。順道去埋琴日見到好似唔錯嘅烤雞餐廳,食埋先返hostel啦~要行返上山wor!meun一打開全部睇唔明,仲洗出翻譯app,只要影住D字就可以翻譯做英文,不過譯完都唔明囉!最後,由一位烏拉圭美女出手相救,幫手開解meun之迷,仲為幫問埋餐廳上網密碼。原來人地都去過香港工幹,又一口流利英文,又靚女!烏拉圭真係出名美女多~隨便一個都殺死人!

2015年12月14日星期一

Oscar Bakery vs 糧友パン工房 芝士撻大比

回港後與在紐西蘭認識的同名朋友wingwing一起在blogger制造了"口吃在香港",小妹妹食得太勁都要休息下,減下肥:P

近日由另一重要食評家-屎云信補上空缺,繼續食啊!!新人上任,先來一口氣試吃兩間芝士撻,分別為Oscar Bakery和糧友パン工房。

Oscar Bakery:芝士撻,酥皮撻和89℃流心芝士,清清地不太甜不會滯。藍莓流心牛角酥,似食藍莓cream cheese,酸酸甜甜。
糧友パン工房:芝士撻,曲奇皮好容易散。芝士不夠流心,但有好厚重芝士味,還有強烈檸檬香味。

屎云信:都話你會鐘意食啦!
我:好流心wor~不過唔夠芝士味......
屎云信:咁呢間夠曬芝士味,你實鐘意啦!
我:好唔流心wor~好夠芝士味但好滯啊......
屎云信:.......你再嘈,打到你話好食T_T

***以上為真實對話***

2015年11月23日星期一

Day7 印加帝國的中心-Cuzco

日期:24/3/2015-24/4/2015
行程:Puerto Maldonado>Cuzco
交通:Expreso los Chankas (12hrs Night Bus )
亞馬遜回到Puerto Maldonado後再坐12個鐘夜車去到位於3300米嘅Cuzco(庫斯科),上次講到坐左架local到不能再loacl嘅巴士,等於坐架無開冷氣又開唔到窗嘅九巴,遙左12個鐘,終於到站啦!更辛苦嘅一日,而家先岩岩開始,計劃今日要係高海拔加唔夠訓再要行足1日下,完成超多格價任務,之後嘅旅程才得以順順利利。係巴士站迷網左陣諗緊行唔行上山好呢....但坐的士都只不過講緊7-10sole,巳經到我訂嘅半山hostel附近。對當地人黎講可能幾貴,因為佢地坐半個鐘小巴才1sole。上車時,司機話今日有活動,上山嘅路都封左,唯有去到最近嘅位置自己行上去慢慢尋覓啦!
一個好重要嘅地方!有熱水沖涼嘅廁所!高原地區唔係間間hostel都有熱水,好多時只係微溫。只有10幾度下,沖微溫水好凍親就會有高山症。
我住嘅地方係前一晚係Booking.com預訂,叫Kurumi hostel,位置方便距離武器廣場約150米,沿路行落山就到。包早餐,又有免費上網和Coca tea,約Usd 5 一晚,非常化算! 而且佢地好好人,比我晨咁早 check in,放低行李係房,仲要沖埋涼,嘆飲杯Coca tea。
Coca tea叫古柯茶,係秘魯一帶生長,有助舒緩高山症、提神醒腦、亦令人帶點點興奮。佢嘅葉可以提煉咖啡因,用作麻醉藥,當然仲可以做毒品啦!只要係秘魯高海拔地區嘅hostel,都會免費提供古柯茶或古柯葉比人沖水飲或就咁食,以防高山症。飲下飲下好似有D上癮tim,特別係Coca糖,真係好好味!之後,問hostel拎張地圖慢慢行落武器廣場,搵車去玻利維亞領事館。

11點左右去到,見到好多韓國人和幾個台灣人係度填表,仲諗住慢慢黎嘅我,先知道領事館12點關門食飯,真巴閉!填完表,放底特區護照,行15分鐘去附近銀行交Usd30簽證費,再返去交回收據就搞掂!批左30日玻利維亞簽證。以為最困難嘅,一切都順順利利~
玻利維亞領事館
地址:Av. Oswaldo Baca Nº 101, primer piso, Urbanización Magisterio, Cuzco
電郵: coliviancusco-peru@hotmail.com
電話:+518-423-1845
辦公時間:週一到週五 8:00-15:30 


坐小巴返武器廣場附近,沿途經過嘅路都係鵝卵石砌成,未知係咪印加時期建造呢?傳說話12世紀,第一個印加王 Manco Capac,被太陽神Inti派去搵Qosq'o即地球嘅中心點。印加王 Manco Capac搵到呢個點就係度起左個城,所以Cuzco嘅盖丘亞語叫做Qosq'o。
呢刻我開始有D手軟腳軟,但都要完成第二個任務先可以食飯。為左係南美唔好比人搵笨,行多幾間唔同嘅舖頭格價係必要。最後決定join Usd108 Bus package,包括兩日一夜食住和Machu Picchu山腳嘅來回van仔。之後,要自己由山腳行8個鐘上熱水鎮同旅行社嘅人接應。呢個真係最經濟嘅上山方法,成個package價錢差不多等於坐火車來回Cuzco和Machu Picchu山上嘅熱水鎮。如果早D買火車票,可以平少少,約Usd79。我份人比較淆底,驚比完錢後佢地無安排妥當,我不斷問一D關於交通上接應問題,問到本身都臭臉嘅阿叔更黑臉。嘿!我唔怕你嫁!唔明梗係要問\_/
之後,仲搵到間更平嘅旅行社做呢款package,只要usd99!可惜比曬錢lu~~~記得係南美要貨比三家啊!
街邊食小吃,一定不能放過!可惜相機SD咭壞左,好多相片都唔見曬。最記得係Cuzco街頭飲過橙汁和Emoliente。
無左影Emoliente嘅相片,不得不偷圖一用XD
呢款飲真係好特別~好似飲啫哩咁,滑滑地,甜甜地!網上搵到資料話,呢款飲品用唔同嘅草藥穀物調制,例如大麥(Barley)、亞麻子(Flax Seeds)、香蕉葉等等。小販將煮泡過唔同材料嘅樽擺係旁邊,有客人買先即刻調制。
午餐食左個好咸嘅咸魚飯,我仲好懷疑呢碗係咪我期待已久嘅Ceviche?!唔係檸檬醃生魚咩?咸魚黎嘅T_T
再去cafe坐陣charge下電,發現係出產咖啡嘅秘魯飲咖啡真係有驚無喜,反而佢地嘅lima soda做得好好飲。
武器廣場
搞好曬簽證、馬丘比丘package、聽日市郊嘅門票和交通安排etc......巳經傍晚,感覺好似工作左24小時先天黑。攰到呢XD
剛好我到達嘅日子係南美洲人其中一個重要節日-Semana Santa。復活節前一星期稱為聖週,都會有一星期節慶活動去紀念和歌頒耶穌為救世人犧牲。無諗過會咁岩遇到遊行係大教堂前開始,可以咁近距離觀看>v<

為左可以睇到難得景況,㨂左間係對住大街嘅餐廳,邊睇邊食,食物水準好好,每人約HKD100/ppl。
隊伍開始移動啦!
羊駝肉配薯條,pizza,再來一杯pisco sour!!

可能太攰關係,就算D野再好食,都食唔落,仲開始有D頭痛tim。唯有打包返hostel聽日食。係路上剛好遇到巡遊隊伍,超近距離接觸到,仲有一齊祈禱,雖然唔知佢地講乜。我都好興奮地感受呢種異地文化!
果然比西班牙人統治過,佢地嘅聖週慶祝活動同西班牙嘅有幾分相似。牧師行係前面,其他神職人員分批枱住聖母像和耶穌像行過指定街道比市民掉出鮮花以作祝福。

2015年8月29日星期六

Day5-6 四日三夜養生團-Amerzon Basin

日期:24/3/2015-24/4/2015
行程:Puerto Maldonado>Amerzon Basin (Tambopata National Reserve)
交通:Tarantula Expedition

亞馬遜好快到尾聲,但有時又覺得時間好慢長,特別係比蚊咬到又痕又痛又腫左成隻雞蛋嘅感覺好似揮之不去咁。最後一日景點去遊覽LAKE SANDOVAL,遇到回程嘅英語系遊客問"你遇到了惡劣情況沒有?" 當下我唔知要比咩反應,原來只係一句輕鬆嘅笑話,係我get 唔到@@"
原來所講嘅惡劣情況係要行一條約4小時嘅泥路入碼頭仔再坐船仔遊LAKE SANDOVAL。泥坑都幾深同埋好滑,唔小心都滑到一下搞到成褲泥。途中能見到物種唔多,都係常見嘅馬騮、切葉蟻、凱門鱷、話說湖中有食人魚,導遊叫我地唔好放隻手落水。 
最特別嘅,相信都係呢隻水雞,係湖邊經常見佢蹤影,飛嘅時候會見到條好長尾巴。
當地人每人拎一個好大條嘅香蕉種子入餐廳附近種
行咁耐終於到呢個碼頭坐船遊LAKE SANDOVAL,離開有食人魚嘅叢林區後,導遊話LAKE SANDOVAL呢度d水好乾淨,我地可以係度游水同埋飲下呢度d水。
黎亞馬遜除左上生物課,仲可以上埋地理課。呢個湖屬於牛軛湖(Ox-bow lakes),形成於河川中下游河道,當河水流到中、下游時,河道於轉彎位,外側流速比內側快,就會形成牛軛湖。是咪好深呢?睇下圖解就明啦!
午餐食亞馬遜傳統食物Juanes,一隻凍冰冰好似糉嘅野,有雞肉係入面。我望一望......點解隔離枱食得咁豪華嘅?我地得一隻糉咋.......導遊都無言以對......
回程時落好大雨,要靠岸避一陣,靚仔導遊係check point嘅迷你博物館講解左陣動物骨頭,就忙住去同check point嘅員工妹妹傾計,行程真係hea左少少.....
壓軸好戲night walk!終於睇到多d唔同嘅昆蟲啦!可惜相機無電,只好拎同團朋友嘅相,我嘅幫忙就係打燈,每張相都少不了我同導遊嘅努力,同埋3個人比蚊咬到痴線嘅一晚。









聽日一早要坐船返Tarantula Expedition公司拎返大背包等巴士去庫斯科,最後一晚嘅晚餐一枱人坐埋一齊食得好開心,雖然我d英文勁差又唔識西班牙文,都無阻雞同鴨講嘅溝通,靚仔導遊再一次同我重溫多日來所見所聽到嘅鳥類。最興奮係見到蜂鳥,對翼真係好似蜜蜂咁,而且飛得好快,同團嘅朋友只係轉身,已經舜間消失左。
返到市區,即刻沖返個熱水涼,為我生平第一個咁長途嘅夜巴作準備。未夠鐘上車,當然要行下Puerto Maldonado個main market順便病肚。食人魚就無得釣,睇下標本都好。仲買左個用椰子殼做嘅烏龜電話座,好鬼得意!
同行朋友件衫爛左,考慮補同唔補之間。唔好煩!我幫佢決定左啦!原來決定左先係最煩,朋友坐係阿姐面前又要咁又要咁,但係完全溝通唔到,阿姐好無奈咁笑一笑,即刻車車車車...好比我地,送客XD
7 sole嘅雞飯!20蚊港幣左右,好抵啊!
驚世大發現係.......made in japan嘅匙和叉!!!
以外表睇係蛇皮果,睇人地blog介紹過Aguaje棕梠樹嘅種子都有幾分似,當日未見到姐姐點做果汁,亦唔知呢個係乜,買包試下先.......嗯......都幾古怪,甜甜地,有少少粉粉地同發酵嘅味,飲完仲好似有d飲醉嘅暈暈地,究竟呢包係乜黎@@"
買d生果上車食先,今晚唔怕餓親!
街頭小食多數都好吸引,普通嘅串燒配個薯仔,買多枝啤酒坐係街邊,真係好地道!咁食2-3串都已經貴過食一份雞飯啦XD
由超期待,計劃旅程,到出發,再到玩完工6日阿馬遜,係此時此刻企係馬路中心望住個咁靚嘅天有d感慨時間過得咁快.......比我企多陣!人生無乜幾何再黎......
唔係唔想企多陣,而係班車唔等人。比完2.50 sole稅,原本係坐5:45pm果班車離開,搞完一輪雞同鴨講,仲搵埋鄉里帶我上車,已經係7:00pm........我仲等緊上巴士啊!係咪黃牛飛黎嫁?!遇到個香港女仔,馬上去打探人地坐幾點車交個朋友啦,佢開口以流利英語沒半句廣東話講完,心諗利害啊~我都想有咁勁嘅英文!原來係UK回流返香港工作,放假黎玩一星期。上車後,我係車頭,佢係車中間,我地無再交流,繼續各自享受12小時巴士之旅。每2-3小時巴士都會停站比人上車落車,比小販上車賣野,要訓得著真係要有好高修行!加上向高海拔進發,Tarantula嘅員工都講過隨時有人嘔嫁!咁好彩真係撞着坐隔離嘅肥阿姨嘔到七彩,仲要直接嘔落地!Ho my god!!即刻比個膠袋佢嘔,再比枝白花油佢搽兩下.......
天啊!我都想嘔X_X"