大牧羊仔仔出走日記: 12日買到破產摩洛哥@Day4 Marrakesh, Essaouira

日期：13/10/2018-24/10/2018
行程：Casablanca> Marrakesh> Essaouira> Kasbah Ait Ben Haddou‌> Dadès Valley> Merzouga Desert> Todra Gorge> Mosque> Azrou> Ifran> Fes> Chefchaouen> Asilah

今日天氣唔錯有藍天太陽，晨早出發往海邊城市Essaouira。途中好多路障炒牌，司機都不幸食咗牛肉乾。開車大約5個多鐘先到，比我地預計車程耐咗。越近Essaouira，天氣變差咗，陰天仲要落雨tim。

係Essaouira邊皮，司機叫我地留意公路邊有無羊企係樹，有就馬上叫佢停車，我地好緊張咁"KAP"住，當見到羊企係樹，大家好齊心咁叫咗出黎😂

去過摩洛哥嘅朋友話，佢話去果時睇唔到羊上樹，話D羊係比人綁住隻腳係樹上曬足一日，以換取遊客影相錢。我返到黎放大張相睇真D係咪比人綁腳，又唔覺wor，但我相信D羊係比人放上去。因為我地每人要比10 durham影相😅

好彩今日係秋季陰天無咁曬，夏天嘅摩洛哥咁熱咁乾，D羊比人綁係樹上曬點頂得住😨

15週大嘅羊BB

呢個地區最出名係Argan oil阿甘油，聽負責人簡單介紹如何取阿甘油。首先曬乾，去果肉，去超硬外殼，磨果仁，壓拃......

阿甘果嘅堅硬外殼

阿甘果嘅果肉及果仁

買完阿甘油，我地去訂咗位嘅Hotel Riad Zahra食我地好期待嘅高級海鮮餐。

細細間精緻嘅餐廳，仲有位暖男待應加2位廚師，就係咁人少少，所以咪等咗成粒鐘先有得食。好彩叫咗枝酒飲下，吹下水，時間好快過。

前菜終於唔係食橄欖啦！有個非常正嘅蕃茄橄欖油麵包，仲有烘底嫁💓

D海鮮真係好食到無心機影相！咁正嘅美食，我地都唔想相機食先，求其影張就食啦！咁細隻嘅蟶子原來先係極品，嫩口鮮甜到無朋友。

八爪魚煮得岩岩好，唔老又唔會太生，非常軟，一咬就斷開。

主角黎啦~朋友話我地食呢隻係藍龍蝦，生活係冰冷太西洋海域。係法國食要100歐元一隻，香港批發Frozen貨都要1700港幣 per kg。食到我地哇哇聲，讚不絕口，大家都想再叫多隻。原本過黎想搵下有無玫瑰龍，點知食到隻仲好食嘅，而且只係300幾蚊。藍龍....多謝你為我呢嘅旅程加上美麗深夜嘅記憶👄

最後一道菜就係旗魚。佢唔係唔好食，不過比藍龍蓋過咗風頭，食落肉質比較結實，但又覺有啲啲咁多霉。聽司機講係Asilah食呢舊魚係好鬼正。等我地遲D再去證實下。

藍龍現真身XD

食左成粒幾2粒鐘，仲要發現新大陸，花左好多時間買圍巾，搞到無時間行街再食多餐街邊海鮮。同Marrakesh比較Essaouira係好舒服嘅！個人覺得可以留一晚😁👍

呢間甜品店都幾好食，可能我鐘意果仁、杏仁等等。基本上都係用呢D做涵料。

呢邊景點唔多，行到海邊睇下炮台影下相，沿路行到碼頭睇下船同魚檔，都差唔多行曬。

有時間係度hea下係幾舒服，朋友係度睇婆婆畫畫，仲想買返張tim。

city walls

有時間係呢邊慢慢行，我都想買返D手信。呢度唔似Marrakesh咁有壓迫感，某D商品有自己特色，唔係賣一式一樣貨品。

貓貓訓到死咗咁😂

Sqala du Port d'Essaouira

司機約咗我地4點幾係停車場等，行一圈得返15分鐘，諗住出黎食多轉平價海鮮，好明顯唔夠時間。除咗講帶住遺憾嘅旅程最令人有回憶，我仲可以講食咗隻咁好味嘅藍龍，都無憾啦！

每個國家總有D動物快車，今次係騾仔😁

諗起由計劃、實行、期待、成行，時間飛逝話咁快已經過咗4日。

嘭嘭聲係入黑前返到Marrakesh，仲有時間我地去再行返轉呢個申水市集。

我地問司機有無食過蝸牛湯，佢竟然話好肉酸唔食。咁.....呢味野係咪厄遊客嫁咋😂
一場黎到乜都要試下，就差在呢碗老火蝸牛湯，真係好咸.....電視介紹話嘅虊材味去咗邊？d肉軟冧冧，又咸，真係唔吸引。螺肉同埋法國蝸牛好食好多。

預訂咗琴日話休息嘅PEPE NERO Haute Cuisine Restaurant，餐廳好靚但服務麻麻，一個呆呆下只識企係度唔知做乜春嘅待應，我地稱佢為7頭，查都未查清楚就話我地無訂枱。等咗差唔多15分鐘，終於有個肥大叔出黎話"佢地有訂枱，咪水池邊果張枱"。umm......意大利人嘅餐廳做野真係咁hea，定係唔想做我地生意，定係咁岩呢個待應咁hea！翠絲話琴晚果間服務實在太好，PPEPE NERO比下去😀