日期：8/3/2019-17/3/2019
行程：reykjavik>blue lagoon>city walk>1 day tour-horse riding* & golden circle afternoon>1day tour-snaefellsnes & kirkjufell small group tour>3 day tour-mývatn, akureyri & north iceland tour>2 day tour-south coast - ice cave, skaftafell & jokulsarlon ice lagoon>reykjavik
成日話唔怕神一般嘅對，最怕豬一般嘅隊友。但係今次嘅旅程 遇到神一般嘅對手啦！冰島嘅天氣飄忽不定，啲風大到阿媽都唔認得，吹到人都癲。
亦因為冰島位處冷暖洋樓交匯處，天氣變幻莫測，成日都好多雲，我哋嚟嘅目的就係想影北極光，同埋去影藍冰洞，呢兩個因素都要喺天氣好嘅情況下先至可以進行。
今次冰島之旅，怕咗啲強風及雪地，由想自駕遊變成參加local tour。無揀自駕遊，旅程當中有好多特色嘅景點都去唔到。究竟我哋喺只有黑白灰藍嘅世界，完成到幾多個目標景點呢?
冰島航空啲飛機餐真係要讚，非常好食，由其啲芝士超水準！
我哋坐咗十幾個鐘頭飛機嚟到斯德哥爾摩，時間緊迫只係有一個鐘頭嘅轉機時間，想買個三文治食都趕唔切呀！喺呢度轉機我哋需要做一次出入境嘅手續。之後，簡直好似喺香港去長洲一樣，上機&落機就去到冰島啦！
落地第一件事梗係去買上網卡啦！仲有買咗一支白酒同埋一支whisky。冰島啲交通配套都非常之方便，由機場坐巴士去到中轉站，等一陣就會有巴士出市區，兜曬成個城市，一般有住宿嘅位置都有巴士站。
第一間住嘅Hostel離中轉站好近，落車過對面已經係我哋住嘅地方。屋仔細細有廁所廚房，一張雙人床同埋碌架床。但係間屋有好強烈嘅硫磺味，啲水喉水都一樣有烈嘅硫磺味。
Settle down之後梗係去食下嘢啦！凍冰冰食返個麵包羊肉湯， 啲湯好新鮮好甜，似蔬菜羊肉清湯，比較稀。麵包好容易就吸乾曬啲湯。不過呢~可以免費任添飲！另外叫咗海鮮忌廉湯，比較之下會更加適合放喺麵包入面，因為濃湯無咁快比麵包吸曬吖。其實都幾抵㗎仲好飽添!
食飽去咗附近嘅超市買今晚嘅餸。預備玩完blue lagoon返嚟煮飯仔。
冰島最抵買係魚子醬😁
呢邊啲物價都幾貴，我哋買羊架都買到有啲肉痛， 細細件嘅羊架要二百幾三百蚊呀！不過好好食就真嘅！
我哋一共買咗三日合共六餐嘅餸。四個人食材總共用咗六百幾蚊。話啲野貴，都超值過去餐廳食。
沒有留言:
發佈留言